Bugun, 11-may kunida Urganch davlat universitetida “Oliy taʼlim muassasasida talabalarni yotoqxona bilan taʼminlash, sport bilan shugʻullanishlari va boʻsh vaqtlarini mazmunli oʻtkazishlari uchun yaratilgan sharoitlar” mavzusida ochiq muloqot boʻlib oʻtdi.

Unda universitet rahbariyati,  “Murojaat24” internet nashri muharriri Najotbek Masharipov, “Xorazmliklar.uz” internet nashri muharriri Farruhbek Karimov, universitet axborot xizmati xodimlari, Tabiiy fanlar va Xorijiy filologiya fakultetlarining talabalari ishtirok etdi.

Ochiq muloqotda UrDU Yoshlar masalalari va maʼnaviy-maʼrifiy ishlar boʻyicha birinchi prorektori Sanjarbek Davletov hamda Moliya va iqtisodiyot ishlari boʻyicha prorektor Alisher Atajonovlar tomonidan Urganch davlat universitetida talabalarni yotoqxona bilan taʼminlash, sport bilan shugʻullanishlari va boʻsh vaqtlarini mazmunli oʻtkazishlari uchun yaratilgan sharoitlar haqida atroflicha maʼlumotlar yetkazildi.

 

Jumladan:

Bugungi kunda  Urganch davlat universitetida 7 ta talabalar turar joylari mavjud boʻlib, ular 2800 sigʻimga ega. Talabalar ushbu TTJlarda yashash bilan birgalikda, bo‘sh vaqtini mazmunli tashkil qilish, ularni kasb-hunar va tadbirkorlikka o‘qitishni tashkil qilish uchun barcha shart-sharoitlar yaratilgan. Xususan, 5-sonli TTJda yoshlarning biznes tashabbuslari, startap g‘oyalari va loyihalarini amalga oshirishga ko‘mak berish, biznes-rejalar ishlab chiqish, maslahat, yuridik, buxgalteriya va boshqa xizmat turlarini ko‘rsatish, forumlar, master-klasslar va seminarlar tashkil etishga xizmat qiladigan “Kovorking markazi” tashkil etilgan.

Shuningdek, talabalar turar joyida sport xonalari mavjud bo‘lib, ularda stol o‘yinlari, qo‘l kuchlanish anjomlari, fitnes klub faoliyat yuritmoqda. Qolaversa, futbol, voleybol, mini-futbol, qo‘l to‘pi maydonchalari bilan ta’minlangan.

Universitet “Sport klubi” 10 mindan ortiq talabalarini oʻz atrofiga jamlagan. Klubda 17 turdagi sport toʻgaraklari faoliyati yoʻliga qoʻyilgan.

Universitet ichki imkoniyatlaridan kelib chiqqan holda 9 ta boʻsh xona ajratilib, ingliz var us tillarini oʼrgatish kurslari, dasturlash markazi, hunarmandchilik markazi, arxitektura va dizayn kursi, tikuvchilik kurslari tashkil qilingan. Bundan tashqari, universitetda mavjud shtatlar doirasida 43 nafar talabalar va 92 nafar magistrlar oʼrindoshlik asosida ishlab kelmoqda.

Ochiq muloqotda masʼullar galdagi rejalar haqida ham toʼxtaldilar, xususan:

Shu yilning yakuniga qadar Kimyoviy texnologiyalar fakulteti hududida 7 qavaqli talabalar turar joyi va 4 ta sport maydonchalari qurish, talabalarning sport bilan shugʼullanishlari uchun yanada kengroq sharoitlar yaratish maqsadida universitetning asosiy binosi hududida 6 ta sport maydonini qurib, ishga tushurish shular jumlasidandir.

Shuningdek, muloqot davomida 2022-yilda universitetning byudjetdan tashqari mablagʻlari hisobidan  980 nafar talabaga jami 3,5 mlrd soʻmlik  ragʻbatlantirish ishlari olib borilgani taʼkidlandi.  Ragʻbatlantirish ishlari 2023-yilda ham davom etayotgani bildirildi.

Ochiq muloqot yakunida savol-javoblar boʼldi, OAV vakillari va talabalar oʻzlarini qiziqtirgan savollariga javoblar oldilar.  

 

UrDU Mtbuot xizmati