Bugungi kunda Urganch davlat universitetida 271 nafar nogironligi bor talabalar tahsil olishadi. Ularning ichida koʻrish, eshitish va gapirish qobiliyatida nuqsoni bor yoshlar ham mavjud. Mazkur yoshlarning sifatli taʼlim olishlari, kelajakda boshqalardan kam boʻlmagan holda jamiyatda oʼz oʼrniga ega boʻlishlari uchun universitetda qator saʼy-harakatlar olib borilmoqda.
Jumladan, Oʻzbekiston Nogironlar assotsatsiyasi Xorazm viloyati hududiy boʻlimi, Oʻzbekiston Karlar jamiyati Xorazm viloyati hududiy boʻlimi hamda Urganch davlat universiteti hamkorligida jamiyatimizdagi har bir yoshlar qatlamini eʼtibordan chetdan qoldirmagan holda talabalar uchun manfaatli loyiha amalga oshirilmoqda. Bugun, 18-may kuni bu boradagi maqsadlarni birlashtirish va galdagi vazifalarni belgilab olish maqsadida davra suhbati tashkil etildi.
Unda UrDU Oʼquv ishlari boʻyicha prorektori S.Xodjaniyozov, Yoshlar masalalari va maʼnaviy-maʼrifiy ishlar boʻyicha prorektor S.Davletov, Nogironlar assotsatsiyasi Xorazm viloyati hududiy boʻlimi raisi Q.Xusainov, Oʻzbekiston Karlar jamiyati Xorazm viloyati hududiy boʻlimi surda tarjimoni Sh.Devonova, “Murojaat24.uz” internet nashri muhbiri N.Masharipov hamda universitetning barcha fakultetlaridan surda tarjimonlikka qiziquvchan, koʻngilli talaba-yoshlar ishtirok etdilar.
Davra suhbatida avvalida, Urganch davlat universitetida nogironligi bor talabalar uchun yaratilgan sharoitlar haqida soʻz borib, endilikda bunday yoshlarning sifatli va uzluksiz bilim olishlar uchun yanada keng imkoniyatlar yaratish maqsadida galdagi rejalarga toʻxtalib oʻtildi.
Uchrashuvda koʻzi ojizlar uchun xorijiy til oʻrganish boʻyicha oʻquv kurslar tashkil etish, surda tarjimonlik boʻyicha koʻngilli talabalar uchun oʻquv kurslar tashkil etish, video darslarda surda tarjimon ishtirokini taʼminlash, koʻzi ojizlar uchun maxsus oʻquv qoʻllanmalar yaratish, surda tarjimonlar guruhini tashkil etish va ular orqali sohani ommalashtirish masalalari muhokama qilindi.
Bu borada talaba-yoshlarning koʻplab fikr-mulohazalari tinglandi, takliflari maʼqullanib, hamkorlikda faol boʻlishga kelishib olindi.
UrDU Matbuot xizmati
