Kimlarga nisbatan ishga kirish chog‘ida dastlabki sinov qo‘llanilmaydi?
- Homilador ayol, uch yoshga to‘lmagan bolasi bor ayol yoki uch yoshga to‘lmagan bolani yolg‘iz o‘zi tarbiyalayotgan ota (vasiy);
- Zahiraga qo‘yiladigan ish o‘rinlariga ishga joylashtirish uchun yuborilgan aholining ijtimoiy ehtiyojmand toifalaridan bo‘lgan shaxslar:
- Davlat grantlari asosida o‘qigan va oliy ta’lim tashkilotini tamomlagan kundan e’tiboran uch oy ichida yo‘llanma bo‘yicha olingan mutaxassisligiga doir ishga kirayotgan oliy ta’lim tashkilotlarining bitiruvchilari;
- Tegishli ta’lim tashkilotini tamomlagan kundan e’tiboran bir yil ichida birinchi bor ishga kirayotganda olingan mutaxassisligi bo‘yicha mustaqil ravishda ishga joylashayotgan umumiy o‘rta, o‘rta maxsus, professional va oliy ta’lim tashkilotining bitiruvchilari;
- O‘zi bilan olti oygacha muddatga mehnat shartnomasi tuzilayotgan xodimlar;
- O‘n sakkiz yoshga to‘lmagan shaxslar;
- ishga qabul qilingan taqdirda ish beruvchi ilgari qaysi xodimlar bilan mehnat shartnomasini alohida asoslar bo‘yicha bekor qilgan bo‘lsa, o‘sha shaxslar;
- Ishlab chiqarishda o‘qitish shartnomasi bo‘yicha ushbu ish beruvchida o‘qishni o‘tagan o‘quvchilar;
- Jamoa kelishuvlarida, shuningdek jamoa shartnomasida va ish beruvchining ichki hujjatlarida nazarda tutilgan boshqa xodimlar. (Mehnat kodeksining 129-moddasiga asosan)
Dastlabki sinov muddati har qanday lavozimdagi xodim uchun bir xil muddatda qo‘llaniladimi?
Dastlabki sinov muddati uch oydan, tashkilotning rahbarlari va ularning o‘rinbosarlari, bosh buxgalterlar hamda tashkilotlar alohida bo‘linmalarining rahbarlari uchun esa olti oydan oshmasligi kerak. (Mehnat kodeksining 130-moddasi 2-qismiga asosan)
Gurlan tumani Adliya bo’limi Yuridik xizmat ko’rsatish markazi Bosh yuristkonsulti J.Jumaboyev.
