Ha, agar harbiy xizmatga majbur yoki chaqiriluvchi hisoblangan ishga kirayotgan shaxsdan tegishli hujjatlar olinmagan hamda ular to‘g‘risidagi ma’lumotlarni mudofaa ishlari organlariga xabar bermaslik javobgarlikka sabab bo’ladi. Buni quyidagicha asoslaymiz
“Umumiy harbiy majburiyat va harbiy xizmat to‘g‘risida”gi Qonuni 51-moddasi 2-qismiga ko’ra, davlat organlarining, shuningdek mulk shaklidan qat’iy nazar korxonalar, muassasalar, tashkilotlarning umumiy harbiy majburiyat va harbiy xizmat to‘g‘risidagi qonunchilikni buzganlikda aybdor rahbarlari, boshqa mansabdor shaxslari, fuqarolar qonunchilikda belgilangan tartibda javobgar bo‘ladilar.
MK 124-moddasi (Ishga qabul qilish chog‘ida talab etiladigan hujjatlar)ga ko’ra, ishga qabul qilish chog‘ida ishga kirayotgan shaxs taqdim etadigan hujjatlardan biri harbiy xizmatga majburlar yoki chaqiriluvchilar uchun tegishincha harbiy guvohnomani yoki harbiy hisobda turganlik haqidagi guvohnomadir.
Demak, e’tibor bering ishga kirayotgan shaxs harbiy xizmatga majbur bo’lsa ushbu xodim harbiy guvohnoma ya’ni “voenniy bilet”ni, agar chaqiriluvchi bo’lsa u holda harbiy hisobda turganlik haqidagi guvohnoma ya’ni “pripisnoy”ni taqdim qilishi shart.
O‘zbekiston Respublikasi mudofaa vazirining 2020-yil 6-iyundagi 390-son buyrug‘iga (Adliya vazirligi tomonidan 2020-yil 30-iyunda ro‘yxatdan o‘tkazildi, ro‘yxat raqami 3272) ilova “O‘zbekiston Respublikasi fuqarolarini harbiy ro‘yxatga olishni tashkil etish va yuritish tartibi to‘g‘risida”gi yo‘riqnomaning 1-bandiga ko’ra, O‘zbekiston Respublikasi Qurolli Kuchlarining zaxirasi va rezervida turuvchi fuqarolar — “harbiy xizmatga majburlar” deb, harbiy xizmatga chaqiriladigan va tuman (shahar) chaqiruv uchastkalarida qayd etilgan fuqarolar — “chaqiriluvchilar” deb ataladi https://lex.uz/uz/docs/-4933234
Yo’riqnomaning 14-bandida harbiy ro‘yxat masalalari bo‘yicha tadbirlarni bajarish jarayonida tashkilotlarning ma’muriyatiga bir qator majburiyatlar yuklangan. Shulardan biri, tashkilotlarning ma’muriyati fuqarolarni ishga (o‘qishga) qabul qilishda ularda harbiy-hisob hujjatlari (harbiy xizmatga majburlar uchun — zaxiradagi ofitser guvohnomasi, harbiy guvohnoma, chaqiriluvchilar uchun — chaqiruv uchastkasida qayd etilganligi haqidagi guvohnoma) mavjudligini tekshirish hamda ularning harbiy hisobda turishini aniqlashga majbur.
Bundan tashqari, tashkilotlarning ma’muriyati ishga (o‘qishga) yangi qabul qilingan yoki ishdan bo‘shatilgan (o‘quv yurtidan chetlashtirilgan) barcha harbiy xizmatga majburlar va chaqiriluvchilar to‘g‘risida 7️⃣ kunlik muddatda mudofaa ishlari bo‘limlariga xabar qilishga majbur.
Yo’riqnomaning 47-bandiga ko’ra, ushbu Yo‘riqnoma talablarining buzilishida aybdor bo‘lgan shaxslar qonunchilik hujjatlarida belgilangan tartibda javobgar bo‘ladilar.
Ma’muriy javobgarlik to’g’risidagi kodeks 231-233-moddalarida umumiy harbiy majburiyat va harbiy xizmat to‘g‘risidagi qonunchilikni buzganlik uchun javobgarlik belgilangan.
Xiva tuman yuridik xizmat ko`rsatish markazi
bosh yuriskonsulti A.Abdusheripov
