Urganch davlat universitetida bugun, 20-avgust sanasida "Urganch davlat universitetida qovunchilik yoʻnalishidagi ilmiy tadqiqotlar bilan tanishuv" mavzusida Media-tur o‘tkazildi. Media-tur universitetning laboratoriya binosida tashkil etildi.

Unda OAV xodimlari va blogerlar  jumladan,  “Huquq va isteʼmolchi” gazetasi muhbiri Q.Eshchanov, USAID Agrobiznesni rivojlantirish loyihasi Xorazm viloyati koordinatori M.Roʻzmetov, murojaat24.uz bosh muharriri N.Masharipov, xorazmliklar.uz bosh muharriri F.Karimov, birgap.uz bosh muharriri M.Dusmatov shuningdek, Paxtachilik seleksiyasi urugʻchiligi ilmiy-tadqiqot markazi Xorazm viloyati boʻlimi boshligʻi PhD R.Karimovlar ishtirok etdi.

Media-tur avvalida Ilmiy ishlar, innovatsiyalar va IPKT boʻlimi boshligʻi Y.Djumaniyazova mehmonlarni Urganch davlat universitetida qishloq xoʻjaligi sohasida olib borilayotgan ilmiy-tadqiqot ishlari va laboratoriyalar haqida qisqacha tanishtirib oʻtdi.

Shundan soʻng, UrDU “Qovunchilik” boʻlimi rahbari, PhD S.Saʼdullayev mazkur boʻlimning faoliyati, uning tashkil etilishi, qishloq xoʻjaligida qovun yetishtirishda tutgan oʻrni va ahamiyati, boʻlimda olib borilayotgan ilmiy-tadqiqot ishlari haqida tushuntirishlar berib, bu boradagi laboratoriya jihozlari bilan tanishtirdi, qovunning taʼmini aniqlash asbobi yordamida tajriba-sinov oʻtkazib berdi. Bu esa har bir ishtirokchida katta qiziqish uygʻotdi.

OAV xodimlari va blogerlar qovunchilik sohasiga doir ilmiy loyihalar, qovun ekish va yetishtirish,  bugungi kunda Xorazm viloyatida mavjud 125 xildagi qovun navlari, respublika ichki bozorlarida Xorazm qovunlarining nufuzi, eksport talablariga javob beradigan Obinavvot, Jiydayaproq, Qilichboy, Gurvak, Zargulobi kabi bir qator qovun navlari, ularning qandlilik miqdori, shuningdek, Quyi Amudaryo hududidagi tumanlarda suvsiz yetishtiriladigan qovunlar agrotexnologiyasi, qovunni saqlash va qayta ishlash texnologiyasi qolaversa, Urganch davlat universitetining 17,5 gektarni tashkil etadigan tajriba xoʻjaligi maydonida bugungi kunda olib borilayotgan ilmiy-tadqiqotlar haqidagi qiziqarli maʼlumotlarga ega boʻldilar.  

Media-tur davomida mehmonlar universitet laboratoriya binosidagi GIS markazi, Kimyoviy laboratoriya, Biologiya laboratoriyasi hamda Tuproq laboratoriyasi bilan ham yaqindan tanishdilar.

Media-tur qizgʻin muhokama va qiziqarli savol-javoblarga boy tarzda  oʻtdi. 

 

UrDU Matbuot xizmati