Мазкур тартибни бузган ҳайдовчилар 165 минг сўм мидқорида жаримага тортилади.
Эндиликда Ўзбекистонда қоидабузарликларни аниқловчи махсус қурилмалар ҳайдовчиларнинг автомобилларни бошқаришда хавфсизлик камаридан фойдаланиш қоидаларини бузиши каби ҳолатларни аниқлайди. Бу ҳақда Ички ишлар вазирлиги Жамоат хавфсизлиги департаменти Йўл ҳаракати хавфсизлиги хизмати хабар берди.
“Йўл ҳаракати хавфсизлиги” қоидаларининг қуйидаги бандларида бу бўйича:
- 9-бандида — конструксиясида хавфсизлик камарлари назарда тутилган транспорт воситасини бошқараётган ҳайдовчи ҳаракатни бошлашдан олдин хавфсизлик камарини тақиб олиши;
- 11-бандида — йўловчиларга хавфсизлик камарларини тақишлари ҳақида огоҳлантириши;
- 23-бандида — хавфсизлик камарлари билан жиҳозланган транспорт воситаларида ҳаракатланишдан олдин уларни тақиб олиши шартлиги қайд этилган.
Таъкидланишича, Маъмурий жавобгарлик тўғрисидаги кодекснинг 125-моддаси 1-қисми билан мазкур қоидаларга амал қилмаслик БҲМнинг 50%и (165 минг сўм) мидқорида жарима солишга сабаб бўлади.
Кимлар хавфсизлик камарини тақмасликлари мумкин ?
Қуйидагиларга хавфсизлик камарини тақмасликка рухсат берилади:
- автомобилнинг орқа ўриндиғидаги 12 ёшгача бўлган болалар;
- ўқув-машқ транспорт воситасини ўқувчи бошқараётган вақтда автомототранспорт воситасини ёки шаҳар электр транспортини бошқаришни ўргатувчи амалий машғулотлар инструктори;
- ҳомиладор аёллар, саломатлиги хавфсизлик камари тақиш имконини бермайдиган беморлар (Соғлиқни сақлаш вазирлиги томонидан белгиланган касалликлар рўйхатига мувофиқ ва ушбу касалликлар билан касалланганлиги бўйича тиббий маълумотнома мавжуд бўлганда);
- хизмат вазифасини бажараётган ходимга бириктирилган кўк ёки қизил ёхуд кўк ва қизил рангли ялтироқ маёқчаси билан жиҳозланган ҳамда махсус рангли бўёқ схемалар ва ёзувлар билан белгиланган транспорт воситалари ҳайдовчиси ва йўловчилари.
Бундан ташқари, мотоцикл ва мопедда ҳаракатланаётган ҳайдовчи ва йўловчилар махсус мотошлем кийишлари ва уни қадаб олишлари шарт.
Президентнинг 2022-йилнинг феврал ойида қабул қилинган тегишли қарори билан, Тошкент шаҳрида мавжуд барча чорраҳаларни йўл ҳаракатини бошқаришнинг автоматлаштирилган бошқарув тизимига интегратсия қилиш белгиланган
Янгиариқ туман юридик хизмат кўрсатиш маркази бошлиғи: У.Наврузов
