Umidsiz soliq qarzi – ayrim soliq to‘lovchilar va soliq agentlari zimmasida turgan soliqlarning to‘lanishi va (yoki) undirilishi imkoni bo‘lmay qolgan soliq qarzi.
O‘zbekiston Respublikasi Soliq kodeksining 96-moddasiga muvofiq, quyidagilar undirish imkoni bo‘lmay qolgan umidsiz soliq qarzi deb e’tirof etiladi:
▪️ yuridik shaxs tugatilganda — yuridik shaxsning mol-mulki yetarli emasligi va (yoki) shu yuridik shaxsning muassislari (ishtirokchilari) tomonidan qonunchilikda belgilangan miqdorda va tartibda uning soliq qarzini uzish imkoni bo‘lmaganligi sababli uning uzilmay qolgan qismi bo‘yicha;
▪️ yakka tartibdagi tadbirkor yoki jismoniy shaxs bankrot deb e’tirof etilganda — qarzdorning mol-mulki yetarli emasligi sababli soliq qarzining uzilmay qolgan qismi bo‘yicha;
▪️ jismoniy shaxs vafot etganda yoki jismoniy shaxs vafot etgan deb e’lon qilinganda — uning mol-mulki yetarli emasligi sababli, shu jumladan meros davlat mulkiga o‘tgan taqdirda, uning soliq qarzining uzilmay qolgan qismi bo‘yicha;
▪️ sud tomonidan hujjat qabul qilinib, unga muvofiq soliq organi soliq qarzini undirishning belgilangan muddati o‘tishi munosabati bilan uni undirish imkoniyatini yo‘qotganda, shu jumladan sud tomonidan soliq qarzini undirish to‘g‘risida ariza berishning o‘tkazib yuborilgan muddatini tiklashni rad etish haqida ajrim chiqarilganda;
▪️chet el yuridik shaxsi soliq organidan hisobdan chiqarilganda.
Shuningdek, soliq qarzini undirilishi umidsiz qarz deb e’tirof etish va uni hisobdan chiqarish to‘g‘risida qaror qabul qilish vakolatiga ega organlar Soliq kodeksiga ko‘ra, quyidagilar hisoblanadi:
▪️ yuridik shaxs joylashgan yerdagi yoki jismoniy shaxsning yashash joyidagi soliq organlari;
▪️soliq to‘lovchi yoki soliq agenti hisobda turgan joydagi soliq organlari;
▪️O‘zbekiston Respublikasining Davlat bojxona qo‘mitasi tomonidan belgilanadigan bojxona.
Tuproqqal’a tuman adliya bo`limi Yuridik xizmat ko`rsatish markazi Bosh yuriskonsulti Urazbayev Tursunboy
