Yaqinda bir tanishimning nomidan firibgarlar tomonidan kredit rasmiylashtirilibdi. Qanday qilib firibgarlar tuzog‘idan himoyalansam bo‘ladi?
O‘zbekiston Respublikasining “Kredit axboroti almashinuvi to‘g‘risida”gi O‘zbekiston Respublikasi Qonuniga kredit sohasidagi munosabatlarni yanada takomillashtirishga qaratilgan o‘zgartirish va qo‘shimchalar kiritish haqida”gi Qonuniga muvofiq, kredit bitimi tuzishi taqiqlangan shaxslar reestri joriy etildi. Bu bilan jismoniy shaxslar to‘g‘risidagi ma’lumotlarni kredit bitimi tuzishi taqiqlangan shaxslar reestriga kiritishi mumkin.
Jismoniy shaxslar to‘g‘risidagi ma’lumotlarni kredit bitimi tuzishi taqiqlangan shaxslar reestriga kiritish tartibi qanday?
Jismoniy shaxs o‘zining ishtirokisiz yoki xabarisiz kredit bitimi rasmiylashtirilishining oldini olish uchun o‘zi bilan kredit bitimini tuzishni kredit byurosiga ariza kiritish orqali taqiqlashi mumkin.
Kredit bitimini tuzishni taqiqlash yoki bunday taqiqni olib tashlash to‘g‘risidagi ariza O‘zbekiston Respublikasi Yagona interaktiv davlat xizmatlari portali orqali elektron shaklda, davlat xizmatlari markazlari yoki kredit byurolari orqali yozma yoki elektron shaklda murojaat qilish asosida beriladi.
Kredit bitimini tuzishni taqiqlash yoki bunday taqiqni olib tashlash to‘g‘risidagi ariza olingan paytdan e’tiboran kredit byurosi tomonidan darhol kredit bitimi tuzishi taqiqlangan shaxslar reestriga kiritiladi.
Kredit bitimini tuzishni taqiqlash yoki bunday taqiqni olib tashlash ixtiyoriy ravishda amalga oshiriladi. Bunda mazkur xizmatlar O‘zbekiston Respublikasi Vazirlar Mahkamasi tomonidan belgilangan tartibda bepul asosda ko‘rsatiladi.
Jismoniy shaxslarning kredit bitimini tuzishini taqiqlash to‘g‘risidagi arizalari ro‘yxati kredit bitimi tuzishi taqiqlangan shaxslar reestrida kredit byurolari tomonidan yuritiladi.
Kredit bitimi tuzishi taqiqlangan shaxslar reestridan kredit bitimini tuzish taqiqi mavjudligi yoki bunday taqiq olib tashlanganligi to‘g‘risidagi axborotni olmasdan turib kredit bitimini tuzish taqiqlanadi. Bunda banklar yoki nobank kredit tashkilotlari yoxud mikromoliya tashkiloti faoliyatini amalga oshiruvchi to‘lov tashkilotlari jismoniy shaxsning ishtirokisiz yoki xabarisiz amalga oshirilgan kredit bitimidan kelib chiqadigan huquqiy oqibatlar uchun javobgar bo‘ladi.
Kredit axborotidan foydalanuvchilar jismoniy shaxslar to‘g‘risidagi axborotni kredit bitimi tuzishi taqiqlangan shaxslar reestridan bepul asosda oladi.
Mazkur tartib fuqarolar nomiga ularning xabarisiz kreditlarni berish va taqdim etilgan pul mablag‘larini o‘zlashtirish hollarining oldini olishga, xizmat qiladi.
Tuproqqal’a tuman adliya bo`limi Yuridik xizmat ko`rsatish markazi Bosh yuriskonsulti Sadikova Manzura
