Аксарият ташкилот ва корхоналарда (мен билган юқори даражадаги вазирлик идораларда ҳам) ходимга интизомий жазо қўлланса, унга бериладиган барча мукофотлар, қўшимча тўловлар, устамалардан маҳрум қилишади.
БУ МЕҲНАТ КОДЕКСИНИНГ 299-МОДДАСИГА ЗИД
Келинг бир таҳлил қилиб ўтамиз. Меҳнат кодексининг 299-моддасига асосан Ишдаги ютуқлар учун ходимга нисбатан рағбатлантириш чоралари қўлланилиши мумкин.
Рағбатлантириш турлари, уларни қўллаш тартиби жамоа келишувларида, жамоа шартномасида, ички меҳнат тартиби қоидалари ҳамда меҳнат тўғрисидаги бошқа ҳуқуқий ҳужжатларда ва меҳнат шартномасида белгиланади.
Ўзига нисбатан интизом ҳақидаги уставлар ва низомларнинг амал қилиши татбиқ этиладиган ходимларга нисбатан рағбатлантириш турлари, уларни қўллаш тартиби интизом тўғрисидаги тегишли уставлар ва низомларда белгиланади.
Шу ўринда қизиқ савол туғилади. Рағбатлантиришга нима кирадию нима кирмайди?
Мазкур модданинг 4-қисмида Иш ҳақи, мукофотлар, қўшимча тўловлар, устамалар ва меҳнатга ҳақ тўлаш тизимида назарда тутилган бошқа тўловлар рағбатлантириш турлари жумласига кирмайди деб белгиланган. Интизомий жазонинг амал қилиш муддати ичида интизомий жавобгарликка тортилган ходимларга меҳнатга ҳақ тўлаш тизимида назарда тутилган мукофотларни тўлаш тўғрисидаги масала мукофотлаш ҳақидаги тегишли низомларда ҳал қилинади дейилган.
Қандай тўловлар рағбатлантириш тўлови ҳисобланади унда? деган ўринли савол туғилиши табиий.
Модданинг 5-қисмига асосан Интизомий жазонинг амал қилиш муддати ичида ходимга нисбатан рағбатлантириш чоралари, шу жумладан меҳнатга ҳақ тўлаш тизимига кирмайдиган ва меҳнат натижаларига асосланмаган мукофотлар ҳам (байрамлар, шу жумладан касб байрамлари, юбилейлар муносабати билан ва ҳоказолар) қўлланилмайди.
Яъни таҳлил якунида шундай хулоса қилиш мумкинки, ходим интизомий жазо олган даврида унга Иш ҳақи, мукофотлар, қўшимча тўловлар, устамалар ва меҳнатга ҳақ тўлаш тизимида назарда тутилган бошқа тўловлар тўланиши керак. Аммо байрамлар, шу жумладан касб байрамлари, юбилейлар муносабати билан тўланадиган тўловлар тўланиши мумкин эмас.
Xiva tumani adliya bo‘limi yuridik xizmat
ko‘rsatish markazi boshlig’i A.Hasanov
