Юртимиз келажаги бўлган ёш авлоднинг ҳуқуқий маданиятини ошириш, уларни суд тизими ва қонунчиликдаги янгиликлар билан таништириб бориш мақсадида Хоразм вилоят судининг фуқаролик ишлари бўйича судлов ҳайъати судьяси Мавсума Йўлдошева томонидан Урганч ихтисослаштирилган санъат мактабида “Судья ва ёшлар” учрашуви ўтказилди.
Мулоқотларда судьялар “Ўзбекистон-2030” стратегиясини “Ёшлар ва бизнесни қўллаб-қувватлаш йили”да амалга оширишга оид давлат дастурининг мазмун-моҳиятига тўхталиб, ёшларга оид давлат сиёсатининг аҳамияти ҳақида ўқувчиларнинг ҳам фикрларини эшитишди.
Айниқса, учрашувда судга низолашиб келган фуқаролардан ким ҳақ эканлигини аниқлаш, уларга қонун талабларини тўғри тушунтира олиш каби судьялик касбининг машаққати ва масъулияти реал воқеалар асосида тушунтирилди.
Шунингдек, Конституциямизда белгиланган фуқароларнинг ҳуқуқ ва мажбуриятлари, вояга етмаганларнинг ҳуқуқлари қонун билан муҳофаза қилиниши, судларда кўриладиган ишлар тоифаси ҳақида маълумотлар берилди.
