Қадимий ва ҳамиша навқирон Хивадаги "Ичан қалъа" давлат музей-қўриқхонасининг "Табобат тарихи" бўлими янги экспонатлар билан бойитилди. Ўзбекистон Ҳамширалар ассоциацияси Хоразм вилояти бўлинмаси ҳамда вилоят ОИТСга қарши курашиш маркази ходимлари томонидан “Соғлом турмуш тарзи — яхши хаёт мақсади” давлат гранти лойиҳаси доирасида "Маданий меросга менинг ҳиссам” шиори остидаги ташаббус орқали музей-қўриқхонага махсус экспонатлар беғараз ҳадя қилинди. Жумладан, мазкур экспонатлар Хива хонлиги даврига оид табобат илмини ўзида акс эттирган тасвирий санъат асарлари ҳисобланади. Таниқли рассом Шерзод Усмонов мўйқаламига мансуб ушбу картиналарда доялар фаолияти, сартарошлик ва ҳаммом хизматлари ифода топган бўлиб, маҳорат билан ишланган ушбу тасвирий санъат асарлари музейга ташриф буюрувчилар томонидан катта қизиқиш билан томоша қилинмоқда.
Хоразм вилоят ОИТСга қарши курашиш маркази врач методисти Шавкат Атаханов
