Президент нутқини ўқиб...
Бугунги кунда жонажон Ватанимиз буюк ва ёруғ истиқбол сари қатъият билан илдамлаётганини ҳеч бир муболағасиз эътироф этиш лозим. Юртдошларимизнинг тобора фаровонлашиб бораётган турмуши ва кундалик ҳаётидаги ижобий ўзгаришлар бунинг яққол тасдиғидир.
Ўзбекистон Республикаси давлат мустақиллигининг 35 йиллик тўйи мамлакатимиз солномасида шунчаки оддий байрам эмас, балки босиб ўтилган тарихий зафарларни сарҳисоб қилиш, бугунги ютуқларни холис баҳолаш ҳамда келажакдаги устувор мақсадларни белгилаб олишга хизмат қилувчи муҳим сиёсий-ижтимоий воқеликдир. Истиқлол — ортда қолган тарихимизга берилган баҳо бўлмай, балки келажак авлодлар олдидаги улкан масъулиятимиздир.
Давлатимиз раҳбари Шавкат Мирзиёевнинг 2026 йил 28 август кунги тантанали маросимдаги дастурий нутқи айнан мана шундай юксак мазмун-моҳият билан суғорилган. Президентимиз ўз маърузасида фақатгина эришилган ютуқларни санаб ўтиш билан чекланмасдан, юртимиз тараққиётининг навбатдаги босқичи учун аниқ ва тизимли вазифаларни кўрсатиб берди. Мустақиллик — миллий ўзлик ва яратувчанлик тимсоли эканлиги мазкур нутқнинг бош ғояси сифатида гавдаланди. Бу эса ҳар биримиздан истиқлолнинг қадрини теран англашни ва уни келажак ворисларига бус-бутун етказишни талаб этади.
Юртимиз суверенитети 1991 йилда халқимизнинг қатъий иродаси билан қўлга киритилган бўлса-да, унинг маънавий пойдевори минг йиллик давлатчилик тарихимизга бориб тақалади. Муҳаммад Хоразмий, Аҳмад Фарғоний, Абу Райҳон Беруний, Абу Али ибн Сино, Мирзо Улуғбек ва Алишер Навоий сингари улуғ алломаларимизнинг жаҳон илм-фанига қўшган ҳиссаси, соҳибқирон Амир Темур бобомизнинг давлат бошқарувидаги бой тажрибаси, Ватан озодлиги йўлида жон фидо қилган Жалолиддин Мангуберди ва Нажмиддин Кубро ҳазратларининг жасорати, шунингдек, жадид боболаримизнинг маърифатпарварлик кураши бугунги озод Ўзбекистоннинг мустаҳкам маънавий асосидир. Истиқлол шарофати билан халқимиз ўзлигини таниди, она тилимиз, миллий қадриятларимиз, муқаддас динимиз ва бой меросимиз қайта тикланди. Шу нуқтаи назардан, мустақиллик шунчаки сиёсий мақом эмас, балки миллий қадриятлар қад кўтарган ва инсон манфаатлари улуғланган янги даврдир.
Давлатимиздаги ислоҳотларнинг бош мезони сифатида “Инсон қадри учун!” деган эзгу ғоя илгари сурилди ва у давлат сиёсатининг марказига қўйилди. Ортга бир назар ташласак, яқин ўтмишда фуқаролар ҳаётига соя солиб келган мажбурий меҳнат, болалар меҳнати, валюта айирбошлашдаги чекловлар ҳамда прописка тизими каби кўплаб оғриқли муаммолар бутунлай бартараф этилганига гувоҳ бўламиз.
Иқтисодиёт тармоқларида ҳам туб бурилишлар юз берди. Хусусан, юртимизга киритилаётган йиллик хорижий инвестициялар ҳажми 2–3 миллиард доллардан 40–50 миллиард долларгача ошгани, ялпи ички маҳсулотни 160 миллиард долларлик маррага етказиш вазифаси муддатидан аввал уддаланиши кутилаётгани нутқда алоҳида қайд этилди. Бу кўрсаткичлар бир ҳақиқатни тасдиқлайди: ислоҳотларнинг бош натижаси қуруқ рақамларда эмас, балки ҳар бир инсоннинг кундалик ҳаёт сифатида намоён бўлиши керак.
Юртбошимиз келгуси ўн йилликни мамлакатимизнинг “миллий юксалиш даври” сифатида белгилаб, бу йўлда еттита муҳим миллий дастурни эълон қилди:
Билимли авлодни тарбиялаш. Келажак тараққиётининг асосий омили билим ва юқори малака ҳисобланади. Бунинг учун мактабгача таълим қамровини кенгайтириш, мактабларни халқаро баҳолаш тизимларига интеграция қилиш, техникумларда жаҳон стандартларини қўллаш ва ёшларни даромади юқори касбларга ўргатиш лозим. Шунингдек, камида 10 та миллий университетнинг дунёдаги ТОП-1000 талик рўйхатга кириши мақсад қилинган. Зеро, замонавий дунёда рақобат табиий бойликлар эмас, балки интеллект ва инновациялар ўртасида кечмоқда.
Соғлом ва узоқ умр кўрадиган халқ. Бу дастур аҳоли саломатлигини мустаҳкамлашга хизмат қилади. Тиббиётга ажратиладиган маблағларни кўпайтириш, касалликларни вақтида аниқлаш (профилактика), тиббий суғуртани барча хонадонларга етказиш ва етакчи хорижий клиникаларни жалб этиш вазифалари белгиланди. Бу тизим соҳада “касалликни даволаш”дан “унинг олдини олиш” тамойилига ўтишни таъминлайди.
Юқори технологияли иқтисодиёт. Янги даврда Ўзбекистон иқтисодиёти юқори технология ва юксак меҳнат унумдорлиги моделига асосланади. Келгуси ўн йилда 450 миллиард доллар хорижий сармоя жалб этиш, 2030 йилга бориб ЯИМ ҳажмини 300 миллиард долларга етказиш ва саноатда 2 миллионта юқори даромадли иш ўрни яратиш режалаштирилган. Стартаплар, венчур молиялаштириш, сунъий интеллект ва рақамли технологияларни ривожлантириш орқали мамлакатимиз хом ашё етказиб берувчидан юқори қиймат яратувчи инновацион давлатга айланади.
Сув ва экология – келажак олдидаги масъулият. Глобал иқлим ўзгариши даврида экологик барқарорлик ва сувни тежаш энг долзарб масаладир. Беш йил ичида экин майдонларини сув тежовчи технологиялар билан 100 фоиз қамраб олиш, “Яшил макон” ҳаракатини кенгайтириб, шаҳар ва туман марказларидаги яшиллик даражасини 30 фоизга етказиш чоралари кўрилади. Бу вазифалар экологик инқироз кучаяётган Марказий Осиё минтақаси учун стратегик аҳамиятга эга.
Қонун устуворлиги – тараққиётнинг мустаҳкам кафолати. Бу йўналиш судлар мустақиллигини таъминлаш ва қонунийликни кучайтиришга қаратилган. Ҳуқуқий тарбияни мактаб давридан бошлаш, тадбиркорлар ва фуқароларнинг ҳуқуқларини ҳимоя қилиш, кибержиноятчилик, гиёҳвандлик ва одам савдосига қарши курашиш тизими кучайтирилади. Яширин иқтисодиёт ҳамда хотин-қизлар ва болалар ҳуқуқлари бузилишига қарши муросасиз кураш олиб борилади. Қонун устувор бўлган юртдагина инсон ҳуқуқи ва иқтисодий барқарорлик таъминланади.
Маҳалла – давлат ва халқ ўртасидаги асосий кўприк. Жамият ҳаётида маҳалланинг роли тубдан оширилади. Бундан буён маҳалла аҳолисининг эҳтиёжлари туман бюджети, инвестиция ва инфратузилма лойиҳаларини шакллантиришда бош мезон бўлади. Бу эса бошқарув тизимининг “юқоридан пастга” эмас, балки халқнинг реал талабларига асосланган ҳолда ишлашини таъминлайди.
Тинчлик ва бағрикенглик – Ўзбекистоннинг бебаҳо бойлиги. Ушбу дастур мамлакатимизнинг халқаро майдондаги тинчликпарварлик нуфузини оширади. Бугун юртимизда 130 дан ортиқ миллат ва 16 та диний конфессия вакиллари аҳил-иноқ яшаб келмоқда. Ўзбекистон ўзининг очиқ ва прагматик ташқи сиёсатини, Марказий Осиёдаги яхши қўшничилик ва иқтисодий дипломатия алоқаларини изчил давом эттиради.
Президент нутқининг бош хулосаси шундан иборатки, бугун Янги Ўзбекистон давлат асосларини мустаҳкамлаш босқичидан миллий юксалиш ва дунё миқёсидаги рақобат даврига қадам қўймоқда. Олдимизда шунчаки янгиланишларни давом эттириш эмас, балки уларни сифат жиҳатидан мутлақо янги босқичга кўтариш вазифаси турибди. Билимли авлод, соғлом жамият, юқори технологиялар, экологик барқарорлик, адолатли қонунлар, кучли маҳалла ва тинчликпарвар сиёсат — келажагимизнинг етти устунидир. Бу устунларни бирлаштириб турувчи ягона куч эса инсон ва унинг интеллектуал салоҳиятидир.
Мустақилликни асраш — уни ҳар куни ҳалол меҳнат ва бунёдкорлик билан қайта барпо этиш демакдир. 35 йиллик тарихимиз машаққатли меҳнат ва улкан ютуқлар даври бўлди, бироқ янги босқич биздан янада юксак масъулият талаб қилади. Юртбошимиз таъкидлаганларидек, халқ ва давлат бир тан-у бир жон бўлиб ҳаракат қилса, енгиб бўлмайдиган тўсиқнинг ўзи йўқ. Шу сабабли, ушбу қутлуғ сана биз учун нафақат тантана, балки имкониятларимизни сарҳисоб қилиш ва келажакка теран назар ташлаш фурсатидир.
Бугун барчамиздан юксак фидойилик ва ташаббускорлик талаб этилади. Истиқлол бир марта бериладиган неъмат эмас, уни ҳар сонияда илм, бирлик ва Ватанга садоқат билан мустаҳкамлаб бориш зарур. Айниқса, журналист ва ижодкорларнинг асосий вазифаси аждодлар мероси бўлмиш озодликни ўз ўткир қалами ва сўзи билан мадҳ этиш, юртимиз имкониятларини юксак тараққиётга айлантиришга ўз ҳиссасини қўшишдан иборатдир.
Ўзбекистон Журналистлар уюшмаси Хоразм вилояти бўлимининг юздан зиёд аъзолари миллий юксалиш йўлидаги умумхалқ ҳаракатининг энг олдинги сафларида туришни ўзларининг муқаддас бурчи деб биладилар. Биз мустақиллигимизни кўз қорачиғидек асраб, уни ҳар куни, ҳар сонияда биргаликда бунёд этамиз.
Дилбар БЕКЧАНОВА,
Ўзбекистон Журналистлар уюшмаси
Хоразм вилояти бўлими раиси
