Коррупция ҳар қандай жамиятнинг иқтисодий, ижтимоий, маънавий ҳаётига хавф соладиган, инсоният ривожига тўсиқ бўадиган иллатлардан ҳисобланади. Коррупция қонун устуворлиги, тенглик ва ижтимоий адолат принципларига путур етказади, иқтисодий тараққиётни қийинлаштиради, давлат хокимияти ва бошқаруви органлари фаолияти асосларига, шунингдек жамиятнинг маънавий негизларига тажовуз қилади.
2025 йилнинг 5 март куни давлатимиз раҳбари Ш.Мирзиёев Коррупцияга қарши курашиш миллий кенгаши йиғилишида иштирок қилиб, ўз нутқида коррупция ислоҳотлар йўлидаги энг катта тўсиқ ва ғов эканини, коррупцияни олдини олиш-давлат хизматига профессионал ва фидойи қадрларни танлаш ҳамда уларни “ҳалоллик вакцинаси” билан эмлашдан бошланиши, шу боис ишга олишдаги тартиб ва ёндашувларни такомиллаштириш лозимлигини, ҳаммамиз ягона куч бўлиб ҳаракат қилсак, албатта, катта ижобий самарага эришишимиз, шу боис барча раҳбарлар, умуман бутун жамоатчилик бирлашиб, коррупцияга “жамият танасидаги саратон” сифатида қарашимиз кераклигини таъкидладилар.
Давлатимиз раҳбари таъкидлаганидек соҳаларда коррупциявий омилларни олдини олишда давлат органлари томонидан фуқароларга кўрсатиладиган хизматларни рақамлаштириш зарур. Ҳақиқатдан бугун рақамлаштириш суд тизими учун ҳам очиқлик ва шаффофликни таъминлаш, судга мурожаат қилувчи фуқароларга интерактив кўрсатиладиган хизматлар сонини кўпайтириш орқали енгиллик яратишда муҳим вазифа ҳисобланади.
2020 йил 3 сентябрдаги Ўзбекистон Республикаси Президентининг “Суд ҳокимияти органлари фаолиятини рақамлаштириш чора-тадбирлари тўғрисида”ги Фармони, 2025 йил 21 августдаги Ўзбекистон Республикаси Президентининг “Судлар фаолиятига сунъий интеллект технологияларини жорий этиш орқали одил судловга эришиш даражасини ошириш ҳамда суд тизимининг моддий-техник таъминотини яхшилашга доир қўшимча чора-тадбирлар тўғрисида”ги Фармони қабул қилингани эса фуқароларга кўрсатиладиган хизматларни рақамлаштириш жараёнини янги босқичга олиб чиқди.
“Судлар коррупцияга мутлақо қарши” рукни остида соҳада кенг қамровли ташаббуслар илгари сурилмоқда. Хусусан Олий суд Раёсатининг тегишли қарори билан тасдиқланган Ўзбекистон Республикаси судлари судьяларининг одил судловни амалга оширишдаги ва суд ходимларининг хизмат вазифаларини бажаришдаги фаолияти давомида муайян ҳаракатларни бажариш ёки бажармаслик учун ҳақ (пора) таклиф қилинганлиги тўғрисида хабар бериш ва уни кўриб чиқиш тартиби ҳам коррупцияга қарши курашиш борасидаги муҳим ҳужжат бўлиб хизмат қилмоқда.
Ушбу тартиб амалда ўз натижаларини бермоқда, тартибга риоя қилган ва ўз хизмат бурчини намунали адо этган судья ва суд ходимлари муносиб рағбатлантирилмоқда.
Бундан ташқари, Олий суд раисининг 2024 йил 27 декабрдаги “Судларда коррупцияга қарши курашиш тизимини янада такомиллаштириш чора-тадбирлари тўғрисида”ги буйруғи қабул қилиниб, у билан судларда коррупцияга қарши курашиш тизимини тартибга солувчи 8 та ички идоравий ҳужжат тасдиқланган.
Хулоса қилиб айтадиган бўлсак, коррупцияга йўл қўйган ҳар бир шахс онгли равишда ўз Ватани, оиласи, яқинлари, қолаверса фуқаролик ва инсоний бурчига хиёнат қилган бўлади. Шу билан бирга ҳар қандай жиноят учун жазо муқаррардир.
М.Хасанов
жиноят ишлари бўйича Урганч
шаҳар суди раиси
