Сизнинг иш жойингиз ва иш ҳақингизни сақлаш ҳуқуқингизнинг асоси — Ўзбекистон Республикаси Вазирлар Маҳкамасининг 2024 йил 30 декабрдаги 904-сонли (https://lex.uz/ru/docs/7285847) қарори ҳисобланади. Ушбу қарорда Олий мактаб тингловчилари — давлат органлари ва муассасалари, бюджет ташкилотлари, давлат корхоналари, устав фондида (устав капиталида) давлат улуши 50 фоиз ва ундан ортиқ бўлган юридик шахслар ҳамда устав фондида (устав капиталида) ушбу ташкилотларнинг улуши 50 фоиз ва ундан ортиқ бўлган юридик шахслар ходимларининг асосий иш жойидаги лавозими ва ўртача ойлик иш ҳақи ўқишнинг бутун даври учун сақлаб қолиниши белгиланган.
Бундан ташқари, Меҳнат кодексининг 383–386-моддаларида ўқув таътиллари тартиби назарда тутилган бўлиб, ходим давлат ёки иш берувчи юборган ҳолда ўқишга қабул қилинганида, у ўқиш даврида иш жойи сақланган ҳолда бўлиши мумкинлиги кўрсатилган.
Юқоридаги асосга кўра, умумтаълим мактаби раҳбарияти сизни расмий буйруқ билан ўқишга юбориши, иш жойингизни сақлаши ва ўртача иш ҳақингизни тўлаб бориши шарт. Хива тумани адлия бўлими юридик хизмат кўрсатиш маркази бош юрисконсульти Д. Машарипов
