Ўзбекистон Республикасининг “Илм-фан ва илмий фаолият тўғрисида”ги Қонун (https://lex.uz/docs/4571490)ининг 23-моддасига кўра илмий даражали кадрларни тайёрлаш таянч докторантура, докторантура ва мустақил изланувчилик асосида амалга оширилади.
Бунда, таянч докторантура (фалсафа доктори (Doctor of Philosophy (PhD) и.д.ни олиш) ва докторантура (фан доктори (Doctor of Science (DSc) и.д.ни олиш) доирасидаги илмий фаолият ишлаб чиқаришдан ажралган ҳолда олиб борилади.
Мустақил изланувчилик (PhD ёки DSc и.д. олиш учун) ишлаб чиқаришдан ажралмаган ҳолда олиб борилади, яъни тўлиқ ставкада ишлаб ҳам илмий иш билан шуғулланади.
Шахсий изоҳ: Ушбу ўринда таянч доктарантура ёки доктарантурада ўқишга кирган шахслар ишдан ажралган ҳолда ўқийдилар ва ушбу шахсларга белгиланган миқдорда стипендия тўланади. Ушбу шахслар буткул ишламаслик керак деган фикр бўлмаслиги керак. Улар 0,5 ҳажм (ставка)да педагогик меҳнат фаолияти билан ҳам шуғулланишлари мумкин.
Доктарантурада (шу жумладан, таянч) ўқийдиган ёки мустақил изланувчи бўлган ва ишлаётган ходимларга, бошқа ходимлар каби:
➖меҳнат таътилларидан тенг ҳуқуқлилик асосида ва тўлиқ фойдаланишлари;
➖меҳнатига мувофиқ ҳақ олишлари;
➖ижодий таътилдан фойдаланишлари;
➖ички ҳужжатларга мувофиқ бошқа кафолатлардан ҳам фойдаланишлари мумкин.
Меҳнат кодексининг 387-моддасига кўра, меҳнат фаолиятини ёки педагогик фаолиятни илмий иш билан бирга олиб бораётган шахсларга асосий иш жойида ўртача иш ҳақи ва лавозими сақланган ҳолда қуйидаги муддатларга ижодий таътиллар берилади:
➖фалсафа доктори (Doctor of Philosophy (PhD) илмий даражасини олишга доир диссертацияни якунлаш учун ҳамда дарсликлар ва ўқув-услубий қўлланмалар қўлёзмаларининг муаллифларига – уч ойгача;
➖фан доктори (Doctor of Science (DSc) илмий даражасини олишга доир докторлик диссертацияни якунлаш учун – олти ойгача.
➖Ижодий таътиллар бериш тартиби Вазирлар Маҳкамасининг 1997 йил 11 мартдаги 133-сон қарори (https://lex.uz/docs/517034#854449)га 7-иловасига мувофиқ белгиланади. XIVA TUMAN YURIDIK XIZMAT KO`RSATISH MARKAZI BOSH YURISKONSULTI M.BOYJONOV
