2025 йил 05 март куни Ўзбекистон Республикаси Президенти Ш.М.Мирзиёев Коррупцияга қарши курашиш Миллий кенгаши йиғилишида иштирок этиб, унда юртимизда коррупциядан холи муҳит яратиш бўйича қилинган ишларга баҳо берилиб, келгуси вазифалар белгиланди.
Президентимиз йиғилишдаги маърузасида “Коррупция шундай ёвуз иллатки, у халқнинг давлатга, конституция ва қонунларига ишончига путур етказади. Барқарор ривожланиш ва хавфсизлик учун жиддий таҳдидга айланади” деб таъкидлаб ўтди.
Хўш, коррупция ўзи нима?
Коррупция сўзи лотинча “corruptio” сўзидан олинган бўлиб, “емирилиш”, “бузилиш” деган маъноларни англатади.
Коррупция – шахснинг ўз мансаб ёки хизмат мавқеидан шахсий манфаатларини ёхуд ўзга шахсларнинг манфаатларини кўзлаб, моддий ёки номоддий наф олиш мақсадида қонунга хилоф равишда фойдаланиши, худди шунингдек бундай нафни қонунга хилоф равишда тақдим этишдир.
2017 йил 3 январда “Коррупцияга қарши курашиш тўғрисида” Ўзбекистон Республикасининг қонуни қабул қилинган.
Қонун 34 моддадан иборат бўлиб, унда коррупция атамасининг тушунчаси, коррупцияга қарши курашишнинг асосий принциплари, коррупцияга қарши курашиш соҳасидаги давлат сиёсатининг асосий йўналишлари, коррупцияга қарши курашувчи ваколатли органлар ва уларнинг вазифалари, коррупцияга қарши курашиш соҳасида ҳуқуқий онг ва ҳуқуқий маданиятни юксалтириш, коррупцияни олдини олишга доир чора-тадбирлар, коррупцияга оид ҳуқуқбузарликларни аниқлаш, уларга чек қўйиш, жавобгарликнинг муқаррарлиги, коррупцияга қарши жавобгарлик, коррупцияга қарши курашиш масаласида халқаро ҳамкорлик тўғрисидаги қоидалар белгиланган.
Ушбу коррупция иллати туфайли қуйидаги салбий оқибатлар юзага келади:
1) демократия ва инсон ҳуқуқлари институтларнинг мустаҳкамланишига жиддий путур етказади;
2) кенг жамоатчиликда ҳокимиятга бўлган ишончни сўндиради;
3) жамиятдаги тинчлик, осойишталик, адолат, қонун устуворлиги каби ижтимоий-ҳуқуқий қадриятларнинг бузилишига олиб келади;
4) бозор иқтисодиёти қонуниятларининг бузилиши, яширин иқтисодиётнинг пайдо бўлиши ва ривожланишига замин яратади;
5) давлат бюджетига жиддий зарар етказади ва ҳ.к.
Шу юқоридагиларга кўра, коррупцияга қарши курашиш соҳасидаги давлат сиёсатининг асосий йўналишлари аҳолининг ҳуқуқий онги ва ҳуқуқий маданиятини юксалтириш, жамиятда коррупцияга нисбатан муросасиз муносабатни шакллантириш, давлат ва жамият ҳаётининг барча соҳаларида коррупциянинг олдини олишга доир чора-тадбирларни амалга ошириш, коррупцияга оид ҳуқуқбузарликларни ўз вақтида аниқлаш, уларга чек қўйиш, уларнинг оқибатларини, уларга имкон берувчи сабаблар ва шарт-шароитларни бартараф этиш, коррупцияга оид ҳуқуқбузарликларни содир этганлик учун жавобгарликнинг муқаррарлиги принципини таъминлашдан иборатдир.
2025 йил 05 март куни ўтказилган йиғилишда Президентимиз томонидан коррупциявий жиноятларнинг 75 фоизи туман ва маҳаллада маиший коррупция шаклида содир этилаётганлиги, шу боис энди Коррупцияга қарши курашиш ҳудудий кенгашлари таркиби тўлиқ янгиланганлиги, уларга вилоят халқ депутатлари кенгаши раислари бош бўлиши, коррупциянинг олдини олиш – давлат хизматига профессионал ва фидоий кадрларни танлаш ҳамда уларни “ҳалоллик вакцинаси” билан эмлашдан бошлашни, шу боис ишга олишдаги тартиб ва ёндашувларни такомиллаштириш бўйича топшириқлар берилиб, фикри тоза, коррупцияга тоқатсиз янги авлодни тарбиялаш мақсадида, таълим масканларида ҳалоллик ғояларини сингдириш, уларнинг ташаббусларини қўллаб-қувватлаш муҳимлиги билдирилиб, аҳолининг, айниқса, ёшларнинг ҳуқуқий онги юксалтирилиб, жамиятда коррупцияга қарши курашишга дахлдорлик шаклланиши таъкидлаб ўтилди.
Демак, ушбу иллатга қарши бутун бир жамият бир ёқадан бош чиқариб курашиши, ҳар бир ходим мураккаб шароитларда жамиятнинг ҳозирги ривожланиш босқичи оғир кечаётганлигини чуқур идрок қилиши, хизмат ва турмушда хулқ-атвор қоидаларига риоя қилиши, фуқаро, жамият ва давлатга хизмат қилишда масъулиятни тушуниб етиши лозим.
Хоразм вилоят маъмурий судининг судья катта ёрдамчиси Ў.Матмуродов
